Friday, September 05, 2008

رمضانيات

العنوان مالة شغل بالموضوع 
عدا ان الموضوع كتب في رمضان 

شمعتو عن متصفح قوقل كروم ؟ 
الي ما سمع عنه ولا جربة انصحة بتنزليه و تجربته برنامج روعة ومتميز كأي منتج من منتجات قوقل 
وهذا الرابط 

وحده من اسباب انقطاعي عن التدوين هو حبي ان تكون كتاباتي جيده و هادفة - حتى و ان كنت فشلت في هذا من قبل بس مشوها لي 
ومحاتاتي اذا كان الموضوع اقل من المستوى المطلوب ...  و هذا خلى التدوين عمل اكثر من ما هو متعة و انا بصراحة مو ناقص شغل زياده 

طبعا المقدمات التي سلفت مالها دخل بالموضوع تماما 
موضوعنا اليوم هو الثورة الأقتصادية و ازدياد عوائد البترول وكيفيه استغلالها 
ادري انه كلامي يعتبر تحلطم من نوع ثاني بس يمكن يقراه مسؤول من جزر الواق واق و يطبقة و يحطوني مستشار اهناك ... 
تتوقعون يدفعونلي فلوس  هناك ؟ومنها اني اتلحطم بطريقة ثانيه بما اني كويتي شمعنة بالتحلطم ما عندنا حركات 

الله يسلمكم انا عندي اقتراح بسيط ... وهو تحديد عام لكل وزاره بتقولون لي شلون 
انا اقولكم 
الله يسلمكم نقول مثلا عام 2009 عام الصحة ... خلال هل العام نصرف كل الفائض المالي الكويتي على هل الوزارة من خلال احتياجاتهاواحتياجاتها كثيرة ولكن الفائض يكفي وزياده بعد
مثلا نحتاج احنا على الأقل الي 5 مستشفيات يديده  تبني خلال السنتين القادمتين بعدها يتوقف العمل في المستشفيات الحالية ويتم هدمها و بناء مستشفيات حديثة مكانها 
نستورد اطباء من الخارج ... ومانسترخص ترى مافي استشاري يرضى ب 4000 دينار وهو بديرته يطلع مئات الالوف 
وبهل الحالة نضرب عصفورين بحجر ... اول شي ... نوقف العلاج بالخارج .. والي راح اتكلم عنه بموضوع ثاني 
ونسوي نظام تعليمي للاطباء الكويتيين معترف فيه مو نفس النظام الحالي الي اعترافة ما يوصل للخفجي ويدرسون فيه هل الاطباء المستوردين 
نعطي فلوس المستشفيات الى خمس مؤسسات صحية عالمية ...  تديرها و تبنيها على مزاجها 
ونقيمها بعد 5 سنين و نتعاقد مع الشركة الأفضل من ناحية النتائج ومن ناحية حصولها على شهادات التفوق والأيزو ونخليهم يديرون باقي المستشفيات وتضع خطة للمستشفيات الجديدة 
وبما انه احنا راح ندفعلهم فلوس نخليهم يتكفلون بأرسال الأطباء الي خلصو تدريبهم بالكويت تحت اشراف الأطباء الأجانب الى دول المؤسسات هذي لحد حصولهم على الزمالة أو درجة الدكتوراه 
وتشترط على الطبيب الكويتي الي يقبل بالنظام عقد احتكاري لمدة عشرين سنة ما يقدم استقالته و يحق له العمل بالقطاع الخاص لكن يعمل في المستشفى الحكومي 
طبعا بتقولون هذا ما يصير يسنة اقولكم لا طبعا ما يصير ( شدعوة بصير بمليون سنة عاد ) 
لكن التخطيط و الصرف راح يصير بسنة و يعمل فيه بخطة خمسية ولما تلف الدورة على الوزارات و ترجع سنة وزارة الصحة تتم دراسة جديدة نشوف شنو الناقص 

احلام يقظة ادري بس مالي خلق اتحلطم ... خاصة وانا ادري اني بداوم يوم الأحد بالمستشفى والمكيفات خربانه و غرفة الأطباء غير صالحة للسكن الأدمي 
شفتو الأحلام ؟ 
تتوقعون تصير ؟؟ ترى وايد دول سووها ... ليش عندنا ماتصير !! 
المقالات راح تكون بالعكس ... نبتدى بالأحلام و ارميكم ثاني يوم على أرض الواقع

نحو تحلطم بلون أخر 

6 comments:

Mohammad Al-Yousifi said...

yadroon eb kel hatha

9adegne yadroon

Sowhat said...

هلا بوسلمى
اوكي اوكي ... بس ليش مطنشين ؟؟؟؟
شنو داش بجيبهم ؟؟

Sn3a said...
This comment has been removed by the author.
Sn3a said...

تدري
والله هالفكره حلوة
خصوصا ان الطبيب مو ماكل حقه
ولد خالي توه ياي من كندا
اهو استشاري هناك
اهني شنو موظفينه
دكتور عادي حاله حال واحد توه متخرج
اهو مايا هني الا لأن عياله زهقو ماشافو ديرتهم الا جم يوم كل سنه

انا اقول الله يعين الدكاتره
صحيح في بعضهم الواحد يفكر شلون حصلو الشهاده لكن الدكاتره ابد مو ماخذين حقهم
هذا بقطاع الصحه
واهو قطاع حيوي وهام جدا ويعكس اهتمام البلد يعني مو عشان العلاج مجانانا بالحكومه يطلعون المجانا من روح المريض او المريضه
نحتاج على الاقل 3 مستشفيات يدد
لو يبدون فيهم الحين بيحلون اغلب المشاكل
بالاضافه الى مستشفى متخصص وجديد خاص فقط بالسرطان اللي متواجد باغلب بيوت الكويتيين

والله ام رفيجتي ماصدقت العنايه والاهتمام اللي شافتهم بامريكا
تقول اهيا كانت رايحه متوقعه ترد بجفنها
ردت واهيا احسن منها ماكو
اصلا حبت الدنيا زياده
تقول كافي عقب كل علاج كيميائي يدزولها ورد وحليب ومادري شنو تشجيع انها تحملت هالمرحله

صج مستشفياتنا الداخل اليها مفقود والخارج منها مولود


هذا فقط في قطاع الصحه
باجي القطاعات حدث ولا حرج

الله كريم
ان شاءالله في الاعوام التاليه يمسكون هالخطط شباب يحاتون الديره مايحاتون دنانيرهم
عشان يطبقون اللي ينميها


يعطيك العافيه

Sowhat said...

ام السنع
ولد خالج و غيرة كثيرين ماودهم يرجعون لأنه الحالة بالكويت ما تسر

يعني مثلا ولد خالج كان بكندا بأرقى مستشفيات استشاري يرجع الكويت بدرجة اقل .. ليش بالله مستشفياتكم احسن ؟؟ انتو احسن منهم علشان تنلزون من شهادته .. يخسون ...

الوضع صار كالتالي ...
الدكتور يقول حق نفسة يبا شوف هذيلة الي تغربو شنو استفادو ؟؟؟ ولا شي .. ليششش اطلع و اكل تبن و اتاذي على شنو ترى كله راح اشتغل بالكويت شوية اختبارات على شوية حركات و اترقى
ليش اروح اتعب نفسي

والقهر انه الحكومة صرفت على ولد خالج بو ربع مليون دينار من اول ما خلص ثانوي لي الحين او اكثر
وبالأخير تقبل استقالته بدقيقة و توقعها بعد موظفة عادية ماعندها متوسط

الحالة كسيفة بس لنا الله

Sn3a said...

المشكله ان ولد خالي يحس بتأنيب الضمير ويفضل الشغل بالكويت
بس مثل ماقلت الوضع مايسر
وهناك له احترامه ومكانته

ان شاء الله الجيل الجديد من الاطباء يغيرون هالواقع


الله كريم